Upategiak
Ardoaren kulturak harreman estua du hiribilduarekin. Biasteriko etxe gehienen azpian lurpeko upategiak edo kobak daude antzinakoek egindakoak, eta horietako zenbait inoiz ardoa egiteko erabiliak; alabaina, euren jatorria zaharragoa omen da, eta seguruenik bestelako gauzetarako erabiliko ziren (biltegi, babesleku...). Biasteri zeharo zulaturik agertzen zaigu lur azpian; beste herri bat dela ematen du. Ikerketa berriek esango dute horien zertarako zehatza, baina zalantzarik ez da ardoa ekoizteko nahiz gordetzeko ere erabili zirela bere garaian. Hiribilduaren inguruan arkitektura modernoagoko upategiak ikus daitezke. Turismo Bulegoak bere instalazioetara bisitak egiten dituzten upeltegien zerrenda du.
